Антологија на копнежот од современата македонска поезија - Виолета Танчева-Златева

Песната е рожба на копнежот.​ Среде истрадувањето на болката од недостигот, од кусовечноста и смртноста, копнежот моќно се раскрилува: да се проникне во најдлабокото себство, да се рашират видиците и да се освојат со крупен чекор, да се досегне љубеното битие, но истовремено и најсуштинското јас, да се излезе од мракот, од скудноста на постоењето, да се стане еднаков со Бога преку љубовта и светлината. Како што блескаво забележува нашиот Блаже Конески, копнежот е „потез на жедна рака по ѕвезден предел“.