Невидливи љубови (II издание)

Отсекогаш бил фасциниран од идејата со колку луѓе сме биле во сопствените мисли без тие воопшто да бидат свес­ни за тоа. Колку реплики сме им кажале додека во својата внатрешност сме разговарале со нив, колку нивни одговори сме слушнале, колку реакции сме примиле во тие компулзивно конструирани човечки драми. А сигурно и ние, без да знаеме, сме присуствувале на мноштво такви разговори во нечии други замислени светови. Какви непредвидливи улоги сме изиграле во замислените филмови на пријателите, на познајниците, на целосните туѓинци додека физички сме биле на некое друго место? * * * Книгата „Невидливите љу­бови“ на Владимир Јанковски е полна со една нова урбана бајковност, космополитска и скопска истовремено, цврсто закотвена во реалнос­та, но истовремено поетска и фантазмагорична. Влада Урошевиќ Романот на Јанковски постојано ја нагласува конститутивната моќ на Погледот, незаобиколното соучество на Другиот (во нашето идентитетско и естетско себе-заокружување), како и улогата, што во создавањето на сликата (односно, самата стварност) потполно несвесен за тоа, неминовно ја игра и самиот набљудувач. Елизабета Шелева Одличен! Од корица до корица, од реченица до реченица. (...) Јасно, чисто, ферментирано, почнато и завршено. Точката на крајот од романот метафорично е две точки за неговото наредно дело. Оливера Ќорвезироска